🌹അല്ലാഹുവിന്റെ കാരുണ്യം 🌹1⃣2⃣3⃣ഇസ്ലാമിക പഠനങ്ങൾ ✍🏽മദീനയുടെ👑വാനമ്പാടി

🌹 *അല്ലാഹുവിന്റെ കാരുണ്യം* 🌹

1⃣2⃣3⃣ഇസ്ലാമിക പഠനങ്ങൾ

 *✍🏽മദീനയുടെ👑വാനമ്പാടി* 

തിരുനബി(സ)പറഞ്ഞു: ''അല്ലാഹുവിനു നൂറ് കാരുണ്യമുണ്ട്; അതിലൊന്ന് മാത്രമാണ് മനുഷ്യര്‍ക്കും ജിന്നുകള്‍ക്കും മൃഗങ്ങള്‍ക്കും പ്രാണികള്‍ക്കുമിടയില്‍ ഇറക്കിയിരിക്കുന്നത്. അല്ലാഹു നല്‍കിയ കാരുണ്യം കൊണ്ടാണ് അവ പരസ്പരം ദയയും കാരുണ്യവും കാണിക്കുന്നത്. മൃഗങ്ങള്‍ അവയുടെ സന്താനങ്ങളോട് ദയാവായ്‌പോടെ വര്‍ത്തിക്കുന്നതും അതു കൊണ്ടുതന്നെ! തന്റെ കാരുണ്യത്തിന്റെ തൊണ്ണൂറ്റൊമ്പത് ശതമാനവും അല്ലാഹു (പരലോകത്തേക്ക്) മാറ്റിവെച്ചിരിക്കുന്നു. പുനരുത്ഥാന നാളില്‍ അതു കൊണ്ടവന്‍ തന്റെ അടിമകള്‍ക്ക് കാരുണ്യമേകും.'' (മുസ്‌ലിം)

 ''സൃഷ്ടികര്‍മ്മം നിര്‍വ്വഹിച്ചു കഴിഞ്ഞപ്പോള്‍ അല്ലാഹു ഇങ്ങനെ രേഖപ്പെടുത്തി: ''നിശ്ചയം, എന്റെ കാരുണ്യം എന്റെ കോപത്തെ അതിജയിക്കും. ഈ ഗ്രന്ഥം അവന്റെയടുക്കല്‍ സൂക്ഷിക്കപ്പെട്ടിരിക്കുന്നു. ''(മുസ്‌ലിം)

 കാരുണ്യവാനാണ് നമ്മുടെ നാഥനായ അല്ലാഹു. ഓര്‍ത്തു നോക്കൂ ആ കാരുണ്യപ്രവാഹത്തിന്റെ ആഴവും വ്യാപ്തിയും! അവന്‍ നമ്മെ സൃഷ്ടിച്ചു; ഏറ്റവും സുന്ദരമായ രൂപത്തില്‍! അത്ഭുതകരമായ ശേഷികള്‍ സമ്മാനിച്ചു; കായിക ശേഷികള്‍ നമുക്കു നിര്‍ണയിച്ചെടുക്കാം, കണ്ടറിയാം. എന്നാല്‍ മാനസിക ശേഷികളോ? നമ്മുടെ മനസ്സ്, ബുദ്ധി, വികാര വിചാരങ്ങള്‍... ഇവയുടെയെല്ലാം ആഴവും വ്യാപ്തിയും എത്ര അപാരം! ആന്തരികാവയവങ്ങളുടെ ആസൂത്രണം എത്ര വിചിത്രം! മനുഷ്യന്‍ അത്ഭുത സൃഷ്ടി തന്നെ!

 ജീവിത സുഖത്തിന്റെ വഴികള്‍ അവന്‍ നമുക്ക് തുറന്നു തന്നു. വായുവും വെള്ളവും ഭക്ഷണവും മറ്റെന്തെല്ലാം സൗകര്യങ്ങള്‍! അനായാസം അവ സ്വന്തമാക്കാന്‍ എത്രയെത്ര വഴികള്‍! നാം യാചിച്ചിട്ടല്ല, ചോദിച്ചിട്ടല്ല ഇവയൊന്നും സമ്മാനിച്ചത്; അവന്റെ ഔദാര്യം കൊണ്ടു മാത്രം. 

 എന്നിട്ടും നാമവനെ ഓര്‍ക്കുന്നില്ല. അവന്‍ തന്ന ഔദാര്യത്തെക്കുറിച്ചു മനസ്സിലാക്കുന്നില്ല. അനുവദിച്ചു തന്ന ശേഷികള്‍ക്ക് നന്ദി കാണിക്കുന്നില്ല. അവന്റെ കാരുണ്യം തിരിച്ചറിയുന്നില്ല. എല്ലാം നമുക്കവകാശപ്പെട്ടതു തന്നെയാണെന്നാണു വിചാരം. ആ അവകാശം കിട്ടാതാകുമ്പോള്‍ നാം പിണങ്ങുന്നു. പരിഭവിക്കുന്നു, പ്രതിഷേധിക്കുന്നു, ക്ഷുഭിതരാവുന്നു! അപ്പോഴും കാരുണ്യം ചൊരിഞ്ഞുകൊണ്ടിരിക്കുന്ന നാഥനെ കാണാന്‍ നമുക്ക് കഴിയുന്നില്ലല്ലോ. എണ്ണമറ്റ അനുഗ്രഹങ്ങള്‍ ആസ്വദിച്ചു കൊണ്ട് ലഭിക്കാതെ പോയ ഏതോ നിസ്സാര കാര്യങ്ങളുടെ പേരില്‍ നാമവനോട് പരിഭവിക്കുന്നല്ലോ. 

 ചെറിയ ബുദ്ധിമുട്ടുകളിലൂടെ വലിയ പ്രയാസങ്ങള്‍ തട്ടിനീക്കിയ നാഥന്റെ സ്‌നേഹ സമീപനങ്ങള്‍ നാം കണ്ടെത്തുന്നില്ലല്ലോ. 

 സഹോദരാ, സൂക്ഷ്മമായൊന്നാലോചിച്ചു നോക്കൂ; ഇതല്ലേ നമ്മുടെ അവസ്ഥ? എങ്കില്‍ മനസ്സിലാക്കുക; നന്ദികേടാണു നാം കാട്ടിക്കൊണ്ടേയിരിക്കുന്നത്.

 നാം ജീവിക്കുന്ന ചുറ്റുപാടില്‍ നന്ദിവാക്കുകള്‍ ധാരാളമുണ്ടല്ലോ. വഴി പറഞ്ഞുതന്നയാളോട്, നിസ്സാരമായ സഹായം ചെയ്തു തന്നെയാളോടുപോലും 'താങ്ക്‌സ്' പറയാറില്ല നാം? 

 അങ്ങനെയൊരു വാക്കു പറയാതെ പോകുന്നവരെക്കുറിച്ചു നാം പറയും; നന്ദി കെട്ടവനെന്ന്. എന്നാല്‍ ജീവന്റെ നില നില്‍പിനാധാരമായ, സൗഖ്യങ്ങളുടെ തുടര്‍ച്ചക്ക് അനിവാര്യമായ ഒട്ടനവധി സൗകര്യങ്ങള്‍ അനുവദിച്ചുകൊണ്ടിരിക്കുമ്പോഴും നമ്മുടെ ഹൃദയത്തില്‍ അവയുടെ പിന്നിലെ ആസൂത്രകനും നിയന്താവുമായ നാഥനോടുള്ള നന്ദിവിചാരമെങ്കിലുമുണരാറുണ്ടോ? ഇല്ലായെങ്കില്‍ നാമെത്ര നന്ദികെട്ടവര്‍!

 കാരുണ്യവാനായ അല്ലാഹു ഈ നന്ദികെട്ടവര്‍ക്ക് വീണ്ടും വീണ്ടും ചൊരിച്ചുകൊടുക്കുന്നു അനുഗ്രഹങ്ങള്‍! കാരുണ്യത്തിന്റെ തൊണ്ണൂറ്റൊമ്പതു ശതമാനം അവന്‍ മാറ്റിവെച്ചിരിക്കുന്നു പരലോകത്തേക്ക്, നമ്മെയനുഗ്രഹത്തില്‍ കുളിപ്പിക്കാന്‍! പക്ഷേ ആ കാരുണ്യമേറ്റുവാങ്ങാന്‍ ഈ അവസ്ഥയില്‍ നാം യോഗ്യരാണോ? ജീവിത കാലത്ത് യഥാവിധി നന്ദികാണിക്കാത്തവര്‍ക്കു നേരെ അവന്റെ കാരുണ്യ കടാക്ഷം നീളുമോ? അതുണ്ടാവാന്‍ സാധ്യതയില്ലല്ലോ. 

 വിശുദ്ധ റമളാന്റെ കാരുണ്യത്തിന്റെ വിശേഷപ്പെട്ട ദിനങ്ങളിലെങ്കിലും നമ്മുടെ ബോധമുണരട്ടെ, അനുഗ്രഹങ്ങളെ തിരിച്ചറിഞ്ഞ് അവ സമ്മാനിച്ച നാഥനെ വാഴ്ത്താന്‍! ഉള്ളറിഞ്ഞുകൊണ്ട് അവനെ സ്‌നേഹിക്കാന്‍, സ്‌നേഹപൂര്‍വ്വം അവനെ നമിക്കാന്‍! അപ്പോഴേ നാം കാരുണ്യത്തിനര്‍ഹരാവൂ. 

 *റമദാന്‍ ആദ്യത്തെ പത്തിലെ പ്രാര്‍ത്ഥന* 

റമദാനിലെ ആദ്യത്തെ പത്ത് റഹ്മത്തിന്റെ (കാരുണ്യത്തിന്റെ) പത്ത് എന്നാണറിയപ്പെടുന്നത്

_اَللَّهُمَّ إِرْحَمْنِي يَاأَرْحَمَ الرَّاحِمِينَ۞_

“അല്ലാഹുമ്മര്‍ഹംനീ യാ അര്‍ഹമുറാഹിമീന്‍”

“ കരുണാനിധിയായ അല്ലാഹുവേ, എന്നോട് കരുണ കാണിക്കേണമേ”

റമളാന്‍ മുഴുവന്‍ അധികരിപ്പിക്കാന്‍ ഉള്ള ദിക്ര്‍

ഒരിക്കല്‍ നബി(സ. അ) പറഞ്ഞതായി സല്‍മാന്‍ (റ.അ) നിവേദനം ചെയ്തിരിക്കുന്നു “റമളാനില്‍ നാലു കാര്യങ്ങള്‍ നിങ്ങള്‍ വര്‍ദ്ധിപ്പിക്കുക. അതില്‍ രണ്ട് കാര്യം നിങ്ങളുടെ റബ്ബിന്റെ പൊരുത്തം സമ്പാദിക്കാന്‍ പറ്റുന്നതും രണ്ട് കാര്യം ഒരു നിലക്കും നിങ്ങള്‍ക്ക് ഒഴിച്ചു കൂടാന്‍ പറ്റാത്തതുമാകുന്നു. ഒന്ന് : ശഹാദത്ത് കലിമ, രണ്ട് : പാപമോചന പ്രാര്‍ത്ഥന മൂന്ന് : സ്വര്‍ഗ്ഗത്തിനുവേണ്ടിയുള്ള അപേക്ഷ, നാല് : നരകത്തെ തൊട്ട് കാവല്‍ തേടല്‍” ഈ ഹദീസില്‍ പറഞ്ഞ നാലു കാര്യങ്ങള്‍ ഉള്‍കൊള്ളുന്ന ദിക്ക് റ്.

_اَشْهَدُ اَنْ لآاِلَهَ اِلَّا اللّهُ اَسْتَغْفِرُ اللّهَِ۞ اَللَّهُمَّ اِنِّي اَسْأَلُكَ الْجَنَّةَ وَاَعُوذُبِكَ مِنَ النَّارَِ۞_

“അശ് ഹദു അന്‍ ലാഇലാഹ ഇല്ലല്ലാഹ് അസ്ത അ്ഫിറുല്ലാഹ്, അള്ളാഹുമ്മാ ഇന്നീ അസ് അലുക്കല്‍ ജന്നത്ത വ അഊദുബിക്ക മിനന്നാര്‍”

“അല്ലാഹുവല്ലാതെ ആരാധനക്കര്‍ഹനില്ലെന്നു ഞാന്‍ സാക്ഷ്യം വഹിക്കുന്നു. അല്ലാഹുവേ എന്റെ പാപങ്ങള്‍ പൊറുത്തു തരേണമേ. അല്ലാഹുവേ നിന്നോട് ഞാന്‍ സ്വര്‍ഗം ചോദിക്കുന്നു നരകത്തെ തൊട്ട് കാവല്‍ തേടുകയും ചെയ്യുന്നു.”

 *അര്‍റഹ്മാന്‍* (പരമകാരുണികന്‍):

അല്ലാഹുവിന്റെ ഏറ്റവും സുന്ദരമായ നാമങ്ങളിലൊന്നാണിത്. കാരുണ്യം എന്നത് അവന്റെ ഏറ്റവും സുന്ദരമായ ഗുണമാണ്. അവന്റെ ഈശ്വരീയതയുടെ അടയാളമായ ഈ ഗുണം കാരണമാണ് പ്രപഞ്ചം ഇത്രയേറെ സുന്ദരമായി നിലകൊള്ളുന്നത്. അതുപോലെ വിശുദ്ധ ഖുര്‍ആനിലെ എല്ലാ അധ്യായങ്ങളുടെയും (ഒന്നൊഴികെ) ആദ്യത്തില്‍ രേഖപ്പെടുത്തിയിട്ടുള്ള വാക്യത്തില്‍ അല്ലാഹുവിന്റെ സത്തയെ സൂചിപ്പിക്കുന്ന സംജ്ഞക്കുശേഷം വരുന്ന നാമം ‘അര്‍റഹ്മാന്‍’ എന്നാണ്. ‘റഹ്മത്ത്’ (കാരുണ്യം) എന്ന ധാതുവില്‍ നിന്ന് നിഷ്പന്നമാകുന്ന ഈ ഗുണനാമത്തിന് മറ്റെല്ലാ വിശേഷണങ്ങളെയും ഉള്‍ക്കൊള്ളുന്നു എന്ന വിധത്തിലുള്ള പ്രാധാന്യവുമുണ്ട്. അഞ്ചക്ഷരമുള്ള ‘റഹ്മാന്‍’ എന്ന പദത്തിന് മനുഷ്യന്റെ ഭൌതികജീവിതത്തിലുപരി പാരത്രിക ജീവിതത്തിലും കൂടി അവന്റെ കാരുണ്യം കണ്ടെത്താന്‍ കഴിയും എന്ന് സൂചിപ്പിക്കുന്നു. കാരണം, അല്ലാഹുതആലായെ വിശേഷിപ്പിക്കുന്നത് ‘റഹ്മാനുദ്ദുന്‍യാ വല്‍ ആഖിറഃ'(ഇഹലോകത്തും പരലോകത്തും കാരുണ്യം കാണിക്കുന്നവന്‍)എന്നാണ്. എന്നാല്‍ ‘റഹ്മത്ത്’ എന്ന ധാതുവില്‍ നിന്ന് തന്നെ എടുത്ത ‘റഹീം’ എന്ന വിശേഷണത്തെക്കുറിച്ച് പറഞ്ഞത്, ‘റഹീമുല്‍ ആഖിറഃ'(പരലോകത്ത് കരുണചൊരിയുന്നവന്‍)എന്നാണ്. ഈ ലോകത്ത് അവന്റെ കാരുണ്യത്തെ തിരിച്ചറിഞ്ഞു ജീവിച്ചവന് അല്ലാഹു പരലോകത്ത് കാരുണ്യം നല്‍കുന്നു. ‘റഹ്മാന്‍’ എന്ന വിശേഷണത്തിലൂടെ ദൈവഭക്തനും ദൈവനിഷേധിക്കും ഈ ലോകത്ത് അല്ലാഹുവിന്റെ കാരുണ്യം കണ്ടെത്താന്‍ കഴിയും.

“പരമകാരുണികനും ദയാപരനുമായ അല്ലാഹുവിന്റെ നാമത്തില്‍. സ്തുതിയൊക്കെയും അല്ലാഹുവിനാണ്. അവന്‍ സര്‍വലോക സംരക്ഷകന്‍” (അല്‍ഫാതിഹഃ 1,2)

*അര്‍റഹീം* (കരുണാനിധി):

‘റഹ്മാന്‍’ എന്ന വിശേഷണം പോലെത്തന്നെയാണ് അല്ലാഹുവിന്റെ ‘റഹീം’ എന്ന വിശേഷണവും. സൃഷ്ടികളോടുള്ള അല്ലാഹുവിന്റെ കാരുണ്യത്തിന്റെ അഗാധത മനസ്സിലാക്കാനാണ് ഈ നാമവും ഉപയോഗിക്കുന്നത്. എല്ലാറ്റിലും നിറഞ്ഞുനിന്ന് പ്രാതിഭാസികമായി പ്രപഞ്ചത്തില്‍ പ്രകടമാവുകയും പ്രകാശിതമാവുകയും ചെയ്യുന്നതാണ് അല്ലാഹുവിന്റെ ‘റഹ്മാനിയ്യത്ത്’ എങ്കില്‍, എല്ലാ സൌന്ദര്യത്തിന്റെയും മടക്കവും എത്തിച്ചേരുന്ന ദിവ്യമായ സങ്കേതവും അഭയവുമാണ് അല്ലാഹുവിന്റെ ‘റഹീമിയ്യത്ത്’ എന്നു പറയാം. അല്ലാഹു എന്നാല്‍ അവന്റെ സൃഷ്ടികളെ ശിക്ഷിക്കാന്‍ ഏതുസമയത്തും വാളോങ്ങി നില്‍ക്കുന്ന ഭീകരനായ ഒരു ദൈവമല്ല എന്ന് മനുഷ്യനെ ബോധ്യപ്പെടുത്താനായി ഈ രണ്ട് ഗുണവിശേഷങ്ങള്‍ ഖുര്‍ആനില്‍ ധാരാളമായി പരാമര്‍ശിച്ചത് കാണാം. അല്ലാഹു പറയുന്നു: “ഞാന്‍ വളരെയേറെ പൊറുക്കുന്നവനും പരമകാരുണികനുമാണെന്ന് എന്റെ ദാസന്മാരെ അറിയിക്കുക”. (അല്‍ ഹിജ്ര്‍:49)

“എന്റെ മക്കളേ, നിങ്ങള്‍ പോയി യൂസുഫിനെയും അവന്റെ സഹോദരനെയും അന്വേഷിച്ചു നോക്കുക. അല്ലാഹുവിങ്കല്‍ നിന്നുള്ള കാരുണ്യത്തെ സംബന്ധിച്ച് നിരാശരാവരുത്. സത്യനിഷേധികളായ ജനമല്ലാതെ അല്ലാഹുവിന്റെ കാരുണ്യത്തെ സംബന്ധിച്ച് നിരാശരാവുകയില്ല”. (യൂസുഫ്: 87)